Dużo sie godo terozki ło związkach zawodowych, skiż afery jako zrobioł niejaki panoczek D.

Kożdy wiy ło kim godom, ale nie śmia po nazwisku (wiycie ustawa o danych osobowych).

Tak ech se łoto rozważowoł ło tych związkach i tak ech se pomyśloł, czy ni ma to twor rodym z komuny, kiery przetrzimoł do dziś dnia, ale z twora zrobioł sie potwor.

Jo rozumia, ło swoji trza dbać i jakby co walczyć, ale trzimani etatowych związkowcow nie mieści mi sie w gowie. Bo przeca tym ludziom trza zapłacić i to nie mało, zwolnić jich nie idzie wcale (wiadomo, uprzywilejowano grupa) i co dali? Siedzom na stołkach i dbajom o pracownikow czy o siebie?

Ludzie przeca momy 26 lot gospodarka rynkowo – jak pracownik nie chce i mu sie nie podobo to idzie kaj indzi do roboty. Zresztom mom taki wrażyni, że dzisio w Polsce bezrobocio ni ma, yno ludziom sie nie chce robić. Czasy się zmiyniyły i to ni ma tak, jak za komuny – „czy sie stoji, czy sie leży i tak geltag sie noleży”. Tak to my już mieli i tera jeszcze nasze wnuki bydom spłacać dłogi od Gierka.

Dzisio momy gospodarka rynkowo, a żeby dać trza mieć z czego. Som mom firma i musza dbać o moich pracowników, inakszy pudom robić kaj indzi. Pamiyntejcie, że dobry fachowiec nie musi mieć ochrony, bo jego zabezpieczyniym je to, co poradzi robić.

A związki zawodowe? Do mie to je relikt. Pyrsk

Nie śmia – nie mogę

Geltag – wypłata